بيلگي لر

بئين،ساغلامليق،پيسخولوژي،ايسترئس،بدن ديلي

ايش موحيطينده بدن ديلي

ايش موحيطينده بدن ديلي

ايشينيزده يوكسلمه‌نيزين اوفيسده نئچه ساعت قالديغينيزلا، اينسانلارلا نئجه اونسيت قوردوغونوزلا و يا نئچه لاييهه‌ده ايشتيراك ائتديگينيزله علاقه‌‌سي اولمايا بيلر. ايشين سيرري حركتلرده گيزليدير. يالنيز بدن ديلينيزدن ايستيفاده ائده‌رك هئچ كيم فرقينه وارمادان هر شئيين ايسته‌ديگينيز شكيلده نتيجه‌لنمه‌سيني تعمين ائده بيلرسينيز. بدن ديلي متخصصي ژانينئ دريوئر، اؤزونوزو گؤسترمه شكلينيزده ائتديگينيز كيچيك ديَيشيكليكلرين قيسا يولدان باشقالاري‌نين شعورالتينا خيتاب ائده بيله‌جه‌ييني ايفاده ائدير. اولدوغونوز موحيطلرده سيزه اوستونلوك قازانديراجاق حركتلر:

ايجلاسين اولدوزو اولون

اؤزونوزه موديرينيزه ياخين بير ستول سئچين. بو سايه‌ده آوتوماتيك اولاراق اؤزونو سيزه داها ياخين حيسس ائتمه‌سيني تعمين ائده بيلرسينيز. اوتورما شكلينيز ده چوخ اهميتليدير. كورسونوزون اوجوندا اؤنه دوغرو اوتوراراق اطرافينيزا، ايشه فوكوسلانديغينيز سيقناليني وئرمه‌يينيز مومكوندور. الينيزه موديرينيزين سئوديگيني بيلديگينيز بير شئي آلين. بو، اونون ان سئوديگي قهوه نؤع و يا ايستيفاده ائتديگي ماركا بير قلم اولا بيلر. بو پسيخولوژي قارشيليقلي تأثير اونون ذهنينده ايكينيزي بير آرايا گتيرر و ديله گتيرديگينيز فيكيرلره دستك اولماسيني آسانلاشديرار.

هامييا “بلي” دئديردين

ايش يولداشينيزدان بير ياخشيليق ايسته‌يركن بير اوووجونوز يوخاري دوغرو باخسين. پوليسلر، بو حركتدن عموميتله، سورغويا چكديكلري آداما تأثير ائتمك و راضي سالماق اوچون ايستيفاده ائديرلر. ايسته‌ديگينيز شئيي ايفاده ائديب سؤزلرينيزي بيتيرركن الينيزي اورگينيزه قوياراق قارشينيزداكينا دوست اولدوغونوز مئساژيني وئره بيلرسينيز. سون اولاراق اصل ايسته‌يينيزي سؤيله‌مه‌دن اول بير نئچه سانييه سوسون. "بيليرم هاميميز چوخ مشغولوق آمما (بير آز سسسيزليك ) بو گون بير آز تئز چيخسام مني ايداره ائده بيلرسنمي؟" دئيه بيلرسينيز. بو دقته چارپان سسسيزليك قارشينيزداكي‌نين سيزه بلي دئمه‌سيني آسانلاشديران بير شعورالتي امريدير.

سينير پوزان ايش يولداشينيزي سوسدورون

يولداشينيز ماسانيزين يانيندا دانيشاركن ايشه داوام ائدين. آرديندان بارماقلارينيزي سلاحي خاتيرلادان بير شكله سوخون (باش و ايشاره بارماقلارينيز خاريج اولماقلا ديگر بارماقلارينيزي يومروق ائدين. سربست بوراخديغينيز بو بارماقلار بير سلاحين لوله‌سيني خاتيرلادار). ايشاره بارماغينيزي دوداقلارينيزا آپاراراق دانيشماق ايسته‌مه‌ديگينيزي بيلديره بيلرسينيز. سيزي آنلاماقدا چتينليك چكيرسه، بارماغينيزي اونا دوغرو چئويره‌رك چوخ نورمال بير شئي سؤيله‌ييرميشسينيز كيمي "چوخ ايشيم وار" دئيه بيلرسينيز.

سهوينيزين اوزرينده دورمايين

دئيك كي، ايشلري مهو ائتدينيز. ايش، بونو موديرينيزه اعتراف ائتمه‌يه گلديگينده اونون بير مئتر اوزاغيندا و يان طرفينده دورون. بو دوروش شكلي اونون شعورالتينا بو سهوين اوزرينده چوخ دايانماماسي لازيم اولدوغو مئساژيني وئره‌جك. "همچي‌نين، بو سهو بير داها قطعين تكرارلانماياجاق" دئيه‌رك وضعيتين جديليگيني بيلديگينيز مئساژيني وئره بيلرسينيز.

اوفيس بلاليسيندان قورتولون

چنه‌نيزي يونگولجه قالديرين و اونا بيرباشا خيتاب ائدين. باشينيزي يانا ياتيرتماق قارشينيزداكيندان تسديق ايسته‌ديگينيز معناسينا گله بيلر. اؤزونوزه اولان گووه‌نينيز سانكي اوزرينيزدن آخسين. اونو يولا وئرن بير ال حركتي ائده‌رك اصل ايداره‌نين سيزده اولدوغونو اونا گؤستره بيلرسينيز.

رقابتچي ايش يولداشينيزين اؤهده‌سيندن گلين

دانيشاركن قولونوزو اونون ماساسي‌نين اوزرينه دوغرو اوزادين. بو، "سنين ساحه‌‌نده اولماقدان قورخمورام" مئساژيني وئرر. اونون ماساسينا توخوناراق اؤزونوزو گؤسترين و حيرصلنديگينيز بير شئي وارسا آچيق - آچيق سؤيله‌يين. اونا بو شكيلده مئيدان اوخوياراق ايشلري يولونا قويا بيلرسينيز.

آذربايجانين ايلك ميللي شخصي اينكيشاف پورتالي‌نين فيس بوك صحيفه‌‌سينه سيز ده قوشولون!



اوغورلو اونسيت اوچون 18 بدن ديلي تاكتيكاسي

اوغورلو اونسيت اوچون 18 بدن ديلي تاكتيكاسي

Henrik Edberg –دن...

بدن ديلي معنوي دونياميزين چؤله آچيلان پنجره‌سيدير. بونا اوچون ده اطرافيميزا موسبت مئساژلار وئرمك اوچون بدن ديليندن ايستيفاده ائده بيلمك لازيمدير. بودور سيزه بير نئچه توصيه‌‌:

1 - قوللارينيزي و قيچلارينيزي چاپرازلامايين: بو حركت مدافعه‌‌ دئمكدير. قوللارينيزي دا قيچلارينيزي دا سربست بوراخماليسينيز. چوخ ياييلمادان طبيعي كي!

2 - گؤز كونتاكتي قورون آمما گؤزونوزو ديكيب باخمادان: دانيشديغينيز اينسانلارين گؤزلرينه باخين. بو اونلارين سيزه اينانماسيني تعمين ائدير. آمما چوخ دقتلي و گؤزونوزو آييرمادان باخماماغا چاليشين؛ چونكي بو هم‌صؤحبتينيزي ناراحات ائده بيلر.

3 - اؤزونوزه عايد بير يئرينيز اولماسيندان چكينمه‌يين: راحت اوتورون، كؤشه‌نيزده بوزولمه‌يين، "اوتوردوغوم يا دا گؤزله‌ديگيم بو يئر هله‌ليك منيمدير" ايميجي يارادين. قوللارينيز، قيچلارينيز، قامتينيز سوني دئييل راحت اولسون.

4 - چيگينلرينيزي راحت بوراخين: گرگين اولدوغوموز زامان آغير بير يوك گؤتورموش كيمي چيينيميزي آشاغي سالاريق. بو بيتميش، توكنميش و چاره‌سيز گؤرونمه‌ييميزه سبب اولار. چيگينلرينيزي بير مدت اؤنه - آرخايا حركت ائتديره‌رك راحتلاشديرين، چيگينلرينيز و بوينونوز ديك اولسون. طبيعي كي، هدديني آشمادان و سونيلييه قاچمادان ...

5 – هم‌صؤحبتينيزي آنلاديغينيزي گؤسترين: قارشينيزداكي آدام دانيشاركن اونو دينله‌ديگينيزي گؤسترمك اوچون باشينيزلا تسديقله‌يين. آمما شيشيرتمه‌يين، يوخسا آغاجده‌لن wوودي دامغاسي يئيرسينيز.

6 - باشينيزي ديك ساخلايين: آمما سوني دئييل راحت و طبيعي بير شكيلده ...

7 – هم‌صؤحبتينيزه يؤنه‌لين: قارشينيزداكي آدامين سؤزلرينه اهميت وئرديگينيزي موعيين ائتمك اوچون اونا يؤنه‌لين و يونگولجه اونا دوغرو اييلين. بو اسنادا راحت اولدوغونوزو گؤسترمك اوچون ده آرا سيرا آرخانيزا سؤيكه‌نين. چوخ چوخ اؤنه اييلمه‌يينيز تسديق گؤزله‌ديگينيز و يا چاره‌سيز اولدوغونوز، چوخ چوخ آرخايا ياسلانماغينيز دا ترس و مسافه‌لي اولدوغونوز مئساژيني وئرر.

8 - گولومسه‌يين: بعضي شئيلري خفيفه آلماغي بيلين؛ حادثه‌‌لرين آرخا اوزونده‌كي يومور ايستيقامتيني گؤرون. راحت اولون، گولومسه‌يين. موسبت اولسانيز اينسانلار سيزي دينله‌مه‌يه داها كؤنوللو اولارلار. آمما اؤز زارافاتلارينيزا گولن ايلك آدام سيز اولمايين. بو چاره‌سيز و ناراحات اولدوغونوزو گؤسترير. بير آداملا تانيش اولدوغونوزدا دا گولومسه‌مه‌يه لاقئيد ياناشمايين، آمما بو گولومسه‌مه اوزونوزه ياپيشماسين، عكس حالدا صميمي گؤرونمز.

9 - اوزونوزه توخونمايين: بو ناراحات اولدوغونوزو، عيني زاماندا دقتينيزين داغيلديغيني گؤسترير.

10 - گؤزلرينيز يئره دئييل قارشييا باخسين: يئره و يا هم‌صؤحبتينيز خاريجينده اطرافداكي باشقا شئيلره باخمايين. باشينيز ديك، گؤزلرينيز قارشيدا اولسون؛ آمما اؤنونوزو گؤره بيلمه‌يه‌جك قدر ده اوزاقدا دئييل ...

11 - ساكيت اولون، تلسكن داورانمايين: سرعتينيز چوخ شئيي ايضاه ائدر. مثلا، ياواش -ياواش گزيرسينيزسه بو سيزي ساكيت، اؤزونه ايناملي و ايسترئسسسيز گؤسترير. دئيك كي، بيريسي سيزه سسله‌نير، بوينونوزو سرعتله بيردن او يانا چئويرمك يئرينه ياواش و ساكيت بير شكيلده يؤنلسه‌نيز داها اؤزوندن امين بير دوروش سرگيله‌يرسينيز.

12 – چوخ ترپنمه‌يين: بارماقلارينيزي و بوينونوزو شاققيلداتماق يا دا ماسايا وورماق، ، قيچلارينيزي يئلله‌مك كيمي گرگينليگينيزي موعيين ائدن بو تيپ حركتلردن چكي‌نين. بو ايميجينيزي زدله‌مكله قالماز، قارشينيزداكي آدامين دقتي‌نين داغيليب ناراحات اولماسينا گتيريب چيخارار.

13 - اللرينيزدن ايناملي بير فورمادا ايستيفاده ائدين: اللرينيزي اوزونوزده گزديرمك و يا بير يئره وورماق يئرينه اونلاردان دانيشيغينيزي گوجلنديريجي واسطه‌‌لر اولاراق ايستيفاده ائدين. ايضاه ائتديكلرينيزين تأثيريني آرتيرماق اوچون شيشيرتمه‌يه قاچمادان اللرينيزله آچيقلامالارينيزا گوج قاتين. ايضاه ائتديگينيز بير شئيين بؤيوكلويونو، تأثيريني ايفاده ائتمك اوچون اويغون ال حركتلريندن ايستيفاده ائده بيلرسينيز. آنجاق اللرينيزين اورادان اورايا سوورولماسي‌نين قارشيسيني آلين، اونلاري ايداره ائتميي بيلين.

14 - ايچكينيزي سينه‌نيزين آشاغيسيندا ساخلايين: صؤحبت اسناسيندا الينيزده چاي، قهوه يا دا مئيوه سويو كيمي بير ايچكي وارسا بونو سينه خطتينده، يا دا چنه‌نيزه ياخين بير يئرده توتماق سيزي مدافعه‌‌چي و مسافه‌لي بير آدام اولاراق گؤسترر. ستكاني داها آشاغيلاردا، مثلا بئل ناهييه‌نيزده ساخلايين.

15 - اونورغانيزين هارادا بيتديگي‌نين فرقينده اولون: چوخوموز اوزوموزو ديك توتوب باشيميزي اؤنه ايه‌رك ديك اوتوردوغوموزو سانيريق. آنجاق اونورغاميز زنن ائتديگيميز كيمي بوينوموزدا دئييل داها يوخاريدا، باشيميزين آرخا قيسيمينده بيتير. اوتوروشونوزدا بو معلوماتي فيكرينيزده توتون و بئلينيزله بيرگه باشينيزي دا ديك ساخلايين.

16 – هم‌صؤحبتينيزله آرانيزداكي مسافه‌ني تارازلايين: قارشينيزداكي آداملا آرانيزداكي مسافه 1 مئتردن آز اولماسين. بو مسافه ياخينليق درجه‌‌سينه و دانيشيلان مؤوضويا گؤره ديَيشر آمما تكرارلانان قايدا بودور. هم‌صؤحبتينيزين فردي ساحه‌‌سينه داخيل اولمايين، عكس حالدا سيخيلماسينا و دقتي‌نين داغيلماسينا گتيريب چيخارارسينيز. بو حالدا اوزون بير صؤحبت ده خيال اولار.

17 - يامسيلايين: هم‌صؤحبتيميزله آراميزدا ياخشي بير اونسيت مئيدانا گلميشسه، فرقينه وارماساق دا بير-بيريميزين بدن حركتلريني يامسيلاياريق. سيز ده بونو بير قايدا حالينا گتيرين. هم‌صؤحبتينيز سيزه دوغرو اييلميشسه سيز ده اييلين، سيزه گولومسه‌ييرسه سيز ده گولومسه‌يين. طبيعي كي، هدديندن آرتيغا قاچمادان! آمما هر حركتيني درحال آردينجا تكرارلاماق قريبه بير آتموسفئر ياراداجاق. بورادا دا اؤلچونو قاچيرماماغا فيكير وئرين.

18 - موسبت ياناشما سرگيله‌يين: موسبت، آچيق و راحت اولون. حيسس ائتديگينيز هر شئي بدن ديلينيزه، اورادان دا هم‌صؤحبتينيزه عكس اولونور. بونا گؤره ده دويغولارينيزي ايستيقامتلنديرين، موسبت دوشونجه‌لر بسله‌يين.

آذربايجانين ايلك ميللي شخصي اينكيشاف پورتالي‌نين فيس بوك صحيفه‌‌سينه سيز ده قوشولون!