بيلگي لر

بئين،ساغلامليق،پيسخولوژي،ايسترئس،بدن ديلي

زامان رهبرليگي

زامان رهبرليگي

زامان اصلينده هر كس اوچون ثابتدير، ديگر بير دئييشله هر كس اوچون گونده 24، هفته‌ده 168 ساعت وار. آنجاق بنزر شرطلرده ياشايان و ايشله‌ينلر ايستحصالدا فردي قابيليّتلردن قايناقلانان فرق‌ليليكلر گؤسترير. بو فرقي يارادان فاكتورلاردان بيري ده زامانين نئجه ايستيفاده ائديلديگيدير. زامان رهبرليگي، زاماني عاغيلليجا ايستيفاده ائده‌رك داها محصولدار نتيجه‌لر الده ائديلمه‌سيني تعمين ائدير. گونوموزون شرطلرينه گؤره گونده‌ليك حياتين لازيملي ايشلريني يئرينه يئتيرمك زامانا قارشي رئاللاشديريلان بير مشغوليّت حاليني آلميشدير. بونا گؤره زاماني ياخشي قيمتلنديرميي اؤيرنمك هر كس اوچون ايسترئسسي آزالداجاق، فايدالي بير باجاريقدير.

زامان رهبرليگي اوچون ائديلمه‌سي لازيم اولان ايلك شئي زامانين نئجه كئچيريلديگيني تعيين ائتمكدير. هر كسين حياتيندا ثابت اولان يوخو، يئمك يئمك، فردي تميزليك و باخيم، نقليّات كيمي زروري ايشلر اوچون خرجلنن زامان چيخاريلديقدان سونرا قالان مدت اوچون پلانلاشديرما آپاريلا بيلر. پلان حاضرلاياركن دوروست و حقيقي اولمالي، وظيفه‌‌لري ايله ياناشي اجتماعي فعاليّتلر و مشق اوچون ده زامان آييرماليدير. اوزون و قيسا وعده‌‌لي هدف و پريوريتئتلري تعيين ائتمك، هدفلر اوچون حركت پلاني حاضرلاماق، بونلاري رئاللاشديرماق اوچون ائديله‌جك ايشلر سيياهيسي حاضرلاماق، پريوريتئتلري تعيين ائده بيلمك، خئير دئيه بيلمك، عيني زامان ديليمينه بير نئچه ايشي سيخيشديرماق (مثلا ايشه يا دا مكتبه گئدركن و يا بير شئي گؤزله‌يركن كيتاب اوخوماق، يئمك حاضرلاياركن يا دا دوش قبول ائدركن اوّلدن يازيلميش درس قئيدلريني كاسئتدن دين‌له‌مك كيمي) بو مؤوضودا اساس باشليقلاردير.

تئلئويزييايا و يا آل‌وئر‌ه باشيني قاتماق، تلفوندا صؤحبت ائتمك ان اهميّتلي زامان اوغرولارينداندير. خبرسيز گلن قوناقلار و قضالار (كامپيوترينيزين چؤكمه‌سي يا دا ويروس دوشمه‌سي، ايشيغين سؤنمه‌سي، بيتميش تاپشيريغين اوزرينه چاي تؤكولمه‌سي، بير ايشي ائتمك اوچون لازيملي وسايطلرين هاميسينا صاحب اولونماديغينا سون آندا دقت ائديلمه‌سي كيمي) خصوصيله موعيّن بير تاريخده بيتميش اولماسي لازيم اولان ايشلرين پلانلانماسيندا اوّلجه‌دن حِسابلانمازسا " زامان رهبرليگي فلاكتلري " نه چئوريله بيلر.

بيتمه‌ين صؤحبتلري كسمك، دعوتسيز قوناقلاري آرادان قالديرماق اوچون اؤزونوزه اويغون بير حلّي اوّلجه‌دن حاضرلايين. داواملي ايشلرينيزي بيتيرمك اوچون واختي حِسابلاياركن سون گونلري، ساعتلاري و ثانيه‌لري حِسابا سالمايين. لازيمديرسا سيزه زاماني خاتيرلاتماق اوچون زنگلي ساعت ايستيفاده ائدين و بير ايش اوچون آييرديغينيز زاماندا حقيقتاً او ايشي ائتمكده اولدوغونوزدان امين اولون.

هر شئي سيزدن آسيليدير. ايشلرينيزي پريوريتئت‌لشديرميي باجارين! اوغورلار!!!