بير چوخ اينسان اوچون زامان، ان بؤيوك ايسترئسس اونسورلريندن بيريدير.
گونده‌ليك حادثه‌‌لرين حل ائديليش طرزي، شخصين ايسترئسس وضعيتينه چوخ اهميتلي تأثير ائدير. حادثه‌‌لره ياناشما و اونلارلا باش ائتمه طرزيميز بيزه حياتي آسانلاشديراجاغي كيمي، زهر ده ائده بيلر.
زامان رهبرليگي اهميتليدير
عموميتله گونده‌ليك حياتيميزا باخديقدا قارشيميزا بيزيم مؤوضويا اهميت وئريب دوزلده بيله‌جه‌ييميز، اگر باجارا بيلميريكسه پروفئسسيونال كؤمكله آسانليقلا اؤنله‌يه بيله‌جه‌ييميز بعضي پريوريتئتلي وضعيتلر چيخير. بو وضعيتلردن بيري اولان " زامان رهبرليگي " اساس ايسترئسس قايناقلارينداندير.
زامان دارليغي‌نين گونده‌ليك حياتيميزدا نه قدر پروبلئم اولدوغونو هاميميز بيليريك. زامانينيزدان فايدالي شكيلده ايستيفاده ائتمك يعني " زامان رهبرليگي " اوچون بعضي ايپوجلاري...
• پريوريتئتلري تعيين ائدين: بير گون ايچينده نه قدر شئي ائده بيله‌جه‌يينيزي تخمين ائدين. نه‌لرين ان اهميتلي اولدوغونا قرار وئرين و سيلرينيزي بو هدفه چاتماغا سيخلاشديرين.
• گونونوزو تشكيل ائدين: گونون ايچينده دايم گئجيكمه، آرا وئرمه و پلانلانمايان ايشلرين چيخماغي كيمي وضعيتلر اولار آمما، سيز پريوريتئتلرينيزه باغلي اولاراق گون اوچون قطعي بير پلان جيزين. باشقالاريني راضي سالماق اوچون، اؤز نيزامينيزي پوزماق، اهميتلي ايسترئسس سببلريندندير.
• ايش حياتيندا چوخ سلاهيتي و ايشي باشقالارينا تهويل وئرين: هر ايشي اؤزونوز ائده بيلمزسينيز. باشقالارينا اؤيرتميي و اونلارا گوونميي اؤيره‌نين.
• چتين ايشلري اول ائدين: ائنئرژي سويه‌نيز يوكسك ايكن ان اهميتلي ايشلري حل ائدين. گونون پلانيني ائدركن پريوريتئتي چتين ايشلره وئرين. اونلاري بيتيرديكدن سونرا نه قدر يونگوللشديگينيزه سيز ده اينانا بيلمه‌يه‌جكسينيز. چوخ اهميتلي اولمايان و يا آسانجا ايجرا ائده بيله‌جه‌يينيز ايشلري سونرايا ساخلايين.
• ايشلرينيزي تخيره سالمايين: اهميتلي ايشلري سيزجه اويغون سببلر تاپيب، داها ايره‌لي بير زامانا تخيره سالمايين. بو، فرقينه وارماسانيز دا سيزين اوچون چوخ بؤيوك بير ايسترئسس مئيدانا گتيرر.
• ايجلاسا آييرديغينيز زاماني آزالدين: ييغينجاقلاري گونورتا يئميي ساعتينا و يا ايشدن چيخيش ساعتينا ياخين زامانلاردا ائدين. بئله‌جه اوزون چكمه‌لري مومكون اولماز.
• ايشلري سيخيشديرمايين: ايشلرينيز اوچون آغلا ياخين، رئاللاشا بيلر بير زامان هدفي تعيين ائدين. زامان تضييقي آلتيندا تله‌سيك گؤرولن ايشلرين اكثريتي تكرار ائديلمه‌لي اولورلار. بو دا بير ايسترئسس قايناغي اولور.
• موكمّلييتچي اولمايين: هئچ بير زامان موكمّله چاتا بيلمزسينيز. مقبول بير زامان ايچينده الينيزدن گلنين ان ياخشيسيني ائدين و سونرا ديگر اهميتلي ايشلره يؤنه‌لين. زامان تاپسانيز دايم گئرييه دؤنه بيلر و داها اول بيتيرديگينيز ايشده بعضي ديَيشيكليكلر ائده بيلرسينيز.